ප්‍රාදේශීය ලේකම් කාර්යාලය - කළුතර

ආයතනයේ විකාශනය

කළුතර දිස්ත්‍රික්කයේ කළුතර නගරය කේන්ද්‍ර කර ගෙන කළුතර ප්‍රාදේශීය ලේකම් කොට්ඨාශය පිහිටා තිබේ. කළුතර ප්‍රාදේශීය ලේකම් කොට්ඨාශය උතුරින් පානදුර ප්‍රාදේශීය ලේකම් කොට්ඨාශයටත් දකුණින් බේරුවල ප්‍රාදේශීය ලේකම් කොට්ඨාශයටත් නැගෙනහිරින් බණ්ඩාරගම හා දොඩංගොඩ ප්‍රාදේශීය ලේකම් කොට්ඨාශ වලටත් මායිම්ව පවතින අතර, බටහිරින් සාගරයට ද මායිම්ව පවතී. හෙක්ටයාර් 7770 ක විශාලත්වයෙන් යුතු කළුතර ප්‍රාදේශීය ලේකම් කොට්ඨාශය කළුතර දිස්ත්‍රික් පරිපාලන බල ප්‍රදේශය තුල පිහිටා ඇත. කළුතර ප්‍රාදේශීය පරිපාලන බල ප්‍රදේශය තුල 164,800ක ජන සංඛ්‍යාවක් වාසය කරන බව ජන හා සංඛ්‍යා ලේඛණ ‍තොරතුරු මත අනාවරණය වී ඇත.

කොළඔ ගාල්ල ප්‍රධාන මාර්ගයෙන්ද මුහුදුබඩ දුම්රිය මාර්ගයෙන්ද කළු ගඟෙන් ද වටවී පිහිටා ඇත. කළුතර බෝධීන් වහන්සේ නිසා ‍‍ඓතිහාසික මෙන්ම සංස්කෘතික වටිනාකමක් කළුතරට ලැබී ඇත. කළුතර ප්‍රාදේශීය ලේකම් කොට්ඨාශය හරහා ගලා බසින ප්‍රධාන ගංගාව වන කළුගඟ දිගින් සැතපුම් 70 ක් වන අතර නදියට අයත්වන පෝෂක ප්‍රදේශය තුල ජනාවාස වීම අරමුණු කොට විශාල සමාජ රටාවක් ගොඩ නැගී ඇත.

සමනල ගිරි හිසින් ආරම්භ වන මෙම ගඟ කුඩා ගගුලැල් වලින් හා දිය දහර ඇළවලින් පෝෂණය ලබා ගනිමින් කළු ගං මෝය කටින් මුහුදට ගලා යයි. කළු ගඟ හරහා කුඩා ඇල මාර්ග රාශියක් කොට්ඨාශය පුරාම ව්‍යාප්තව පවතින අතර කොට්ඨාශයේ දකුණු අර්ධයේ පවතින දුම්මලමෝදර ඇල හා  මොරැන් ඇල උතරු අර්ධයේ පවතින අළුත් ඇලත් ප්‍රධාන  වේ. බොල්ගොඩ වැවේ කොටසක් ද අයත් වන අතර කොට්ඨාශයේ උතුරු මායිමේ පිහිටි මෙම වැවට ජල සැපයුම මහවෙල ගඟ හා මහවෙල ඇල මගින් සිදු කෙරේ. මෙම පාරිසරික පද්ධතිය මුල් කර ගෙන වර්ෂය පුරාම ජලයෙන් පිරී පවතින මෙම ප්‍රදේශය තැනිතලා බිම් ස්වරූපයක් හා වගුරු බිමි පවතින නිසා බොහෝ විට සමතුලිත දේශගුණ තත්වයක් දක්නට ලැබේ.

 කළුතර ප්‍රාදේශීය ලේකම් කොට්ඨාශය කළුතර දිස්ත්‍රික් බල ප්‍රදේශය තුල මෙවැනි පාරිසරික පද්ධතියක් ඇතුලත්ව මනා පරිපාලන පද්ධතියකින් පාලනය වේ. නාගරික, අර්ධ නාගරික , හා ගැමි ජන ජීවන රටාවක් පවතින බැවින් ඉතා ක්‍රමවත් පරිපාලනයක් පවත්වා ගත යුතු බැවින් ග්‍රාම නිලධාරී වසම්  87 කට වෙන් කර පරිපාලන පහසුව සලසා ඇත.      

සේවය කල ප්‍රාදේශීය ආදායම් නිලධාරී/ප්‍රාදේශීය උප දිසාපති/ ප්‍රාදේශිය ලේකම්වරුන්